poli-dicht (politischi gedicht mitts ins gsicht)

Der Anti-Diss

Hate Speech nimmt au in de Schwiz leider zue,

das losst mir irgendwie kei Rueh.

Me cha au ohni öbber z beleidige,

sini Meinig vehemänt verteidige.

Au mi mache gwüssi Ussage vo Politiker ame zimmli zornig,

es git vieles, das findi voll nid in Ornig.

No immer kei Grund, zu däne Mittel z griffe

und sich im Ton und indr Wortwahl z vergriffe.

Au d Sanna Marin häns kritisiert,

und on- und offline oft terrorisiert.

Z hübsch, z jung, sie machi z vill Party.

Checkets doch ändlich: Sie isch eifach voll e smarti!

Muetig het sie Finnland gäge usse repräsentiert,

und sich nid vor dütliche Ussage geniert.

Au während Covid het sie das Land chöne guet regiere,

denn no ab ind Nato, also absolut kei Grund, ihri Skills z negiere.

In dr Schuel chunt das leider ständig vor,

mir hän für unseri Kind drum immer e offes Ohr.

Nid provoziere lo, ignoriere, Gränze setze,

und uf jede Fall nid zrugg verletze.

Drüberstoh und guets Vorbild sii,

dört wämer mit unsere Kinder hi.

Und das, was mir unsere Kids für ufe Pauseplatz lehre,

chönt sich au gärn indr Erwachsnewält vermehre.

Bi Politiker, Influencer, Chefs und Personal,

was us eim sim Mul chunt, isch jo jedem sini eigeni Wahl.

Au was me dehei elei ind d Taste tippt,

wenn ein grad öbbis zur Wissgluet tribt,

cha me doch allefalls no überdänke,

und lieber ei moll me öbberem e Lächle schänke.