poli-dicht (politischi gedicht mitts ins gsicht)

Alles, was rächt isch

De Geert Wilders in de Niederlande, dä häts,

d Lüt hän anschinend d Nase voll vo sträng rächts.

Vom Usteile gege wens grad passt,

vor allem d Asylante sind bi ihm sehr verhasst.

Ob das jetzt e Richtigswächsel in Europa git,

ich muess ehrlich sage: Ich weiss es nid.

Au in NY weht mit em Zohran Mamdani bald e neue Wind,

er will sich isetze fürd Iwanderer, für die Arme, fürd Kind.

Und nid nur dörte waches langsam uf,

viel z gross isch mittlerwile das Buff.

All dene Stimme – und das find ich die sehr schlimme,

wo all die Autokrate unterstütze,

will sie ihne zum Erhalt vodr Macht halt nütze –

miemer dezidiert entgegehalte,

und sie nid eifach loh schalte und walte.

Im Grund gno wänn d Lütt doch eifach friedlich zämeläbe,

sich nid an Gsetz z halte, isch jo vo allne voll drnäbe.

Demokratie cha uns debi unterstütze,

aber wichtig isch, dass mir sie au bedacht benütze.

Und dass mir nie vergässe, dra z dänke,

unseri Freiheit nid an die Falsche z verschänke!